Quintino Melis (voce)

>>Vai alla scheda del protagonista<<

Registrazione di Marco Lutzu (22 novembre 2006)

>>Ascolto non disponibile<<

“Ottave scritte da Quintino per il fratello gemello pro su primu anniversario della morte”

Quenziu pro tue est su primu annu
Ch’in su campusantu as cumpridu
Su coro tou pienu ‘e affannu
Su coro tou sempre adoloridu
Rimediu non as otentu mannu
Un’annu a oe chi ses sepellidu
Tropu pesante fiat cussu male
E a morrer ses andadu a s’ispidale

Su bintunu ‘e austu as fatu partenza
In coronarica ti ses sistemadu
Su male tou tenias a conoscenza
De su male non ti nde ses liberadu
Dopo tant’annos e lunga sofferenza
Sa morte a tue chi t’at trascinadu
Trascinadu t’at de settembre su dus
E de su die non esistis piusu

Tue mancadu ses un’annu a oe
Un’annu a oe tue chi mi mancas
S’omine a giovane paret un ‘eroe
Ma de sa morte chi t’affinacat
M’ammentu de su die deghenoe
Quenzio pro totu su male ti stancas
Su seru de austu su bintunu
As lassadu sa famillia e su comunu

Su dus de setembre fit sa data
Mi la tenzo sa data in sa memoria
Arrivada pro tue fit s’ora esata
Sa morte non est cosa provvisoria
Finida pro tue est ogni cumbata
In mesu de sos santos ses a gloria
Lassadu as a totus in piantu
Un’annu a oe chi ses in campusantu

Toccadu a tue su male pesante
De custu male non ti ses difèndiu
Custu male est istadu costante
Chi pius male a tue t’at rèndiu
Sofferenzas teniast bastante
Chi fis finidu l’aias cumprendiu
Partidu ses su bintunu ‘e austu
Su sero m’as nadu totu custu

Tue a sas oras de sas tres
Cun mie a su friscu ses bessidu
M’as nadu non podes tirare sos peses
M’agatu tropu adoloridu
Partidu ses prima de sas sese
E prima de sas sese ses partidu
Pienu de rabia e de fele
E rientras a s’ispidale San Michele

Su die non as fatu pius rientru
Sempre colcadu in d’unu letu
Cando ses partidu fis pagu cuntentu
Sa morte ti fit ristende affettu
Abandonende sa domo e s’aposentu
Pro fagher unu viagiu cumpletu
Pius de su die ses a domo torradu
Chi in sa famìllia furiast aspetadu

Su die torradu non ses
Pro dare cuntentesa a sa famillia
Su bintunu de austu su mese
Mancu su santu at fatu meraviglia
De ti torrare a domo tua a ponner pese
Sa malaria est torrada a fare puntiglia
Non at pensadu mancu Santu Teodoro
De ti sanare perfettamente su coro

Santu Teodoro non at pensatu a tue
In paghe sa famillia lassa mia
In s’ispidale non mi lessis arrue
Apu fatu una bella pregadoria
Non pensis cust’anima de distrues
Mi ca non leas custa maladia
Mi ca non seu un’anima pecadora
Chi turmentende chi mi ses ancora

De su die non t’as bidu prus
Ne sa famillia e ne su parente
Un’avvisu t’at dadu Gesus
Pro bisitare s’Onnipotente
M’ammentu de settembre su dus
De custu mundu non ses prus vivente
Su dus de setembre precisu
Sa morte a tue chi t’at datu avvisu

Su bintunu de austu a parte ‘e sera
Pansamentu tue in testa teniast
Pariat finida ogni carriera
Solu a morrer pensare depiast
M’as nadu custa est s’ultima primavera
Tropu tristu su die chi furias
Sa die t’apu bidu tropu tristu
A su mancu chi mi nde pighet Gesus Cristu

Custu fiat sa die de sa festa
Ch’intesu apu de tue custu faedu
Non mi reget pius sa testa
Non mi reget pius su cherbedu
Non torru pro custa tempesta
A curre devo de nou a Casteddu
Ma deu biver’ ancora peus
Pro ite chi no mi-nde pigat Dues